KTP General Conference Organising Committee hmingin chibai ka buk a che.

Mizoram thalaite puala inkhawmpui lian ber, KTP General Conference chu Mamitin kan lo thleng ve leh dawn ta reng mai a. A thlengtu nih hi thil phurawm leh chakawm tak a nih rualin he hun denchhena Mamit khawpui hmuhna remchang a lo ni hi khual a tanga kal tur tan pawh thil chakawm tak tur niin ka hria.

He Conference atan hian khawtlang pawh theihtawpin kan inbuatsaih a, Organising Committee-in Sub-Committee hrang hrang 12 a siam a, chung zinga Information & Publicity Sub-Committee in he Conference puala Website an buatsaih thei hi lawmawm ka ti hle a ni.

He Website ah hian kan hmalakna leh chetvelna zawng zawng erawh tarlan sen a ni dawn lo mahse, bengvarthlak tak turah ka ngai a ni.

He Conference ah hian Pathian ropui ber se, langsar ber se tih hi kan duh dan a ni. Chutiang tur chuan he website tlawhtute leh a hmuna lo kal tur Palai zawng zawng pawh kan sawm a, min lo tawngtaipui zel turin kan ngen takmeuh che u a ni.

Khawvel thilah chhuan tur kan nei lo, hawntir tur che u pawh kan nei lovang. Khaw dang aia ropui bikna pawh kan nei lo. Amaherawhchu Pathian Thlarau Thianghlim malsawmna changa hlim taka kan tin thei nan tun atanga Pathian hnena tawngtai fan fan turin kan inchah mawlh mawlh a ni.

-Pastor C.S. Rila

(Pastor C.S. Rila, Organising Chairman leh Pastor Hmingdailova, Organising Vice Chairman te hian an Biala a awm hun tur (term) a tawp tak avangin Bial dangah min insawn san ta a, Chairman aiawh tur hian Pro. Pastor Lalhriatpuia, Mamit Hmunsam Pastor Bial chu ruat a ni. Pastor C.S. Rila leh Pastor Hmingdailova ten Conference hlawhtling tak kan neih theihna tura thanhnemngai taka min lo kaihhruai tawhna te ropui kan tiin lawmawm kan ti tak zet a. He Conference hi min rawn hmanpui ve thei ngei se kan ti tak zet a ni.)

Mizoram puma Kristian Thalaite intawhkhawmna lian ber – KTP General Conference vawi 53-na ni 4-7 March, 2009-a Mamit khawpuiin a thlen turah Organising Committee hnuaia Information & Publicity Sub-Committee hmalaknaa website siam a ni hi ropui ka ti hle a.

He website hmanga Organising Committee te nen hma kan lakho dan leh Mamit khawtlang inbuatsaih dan mai bakah Mamit khawpui chanchin khawvel hmun hrang hrang atanga hriat theih tura an rawn chhawp chhuak thei hi ka fak a, lawmawm ka ti takzet a ni.

He website hi a tam thei ang berin an tlawh a, tangkai taka hman a nih theih nan duhsakna sang ber ka hlan e.

JOHN ROTLUANGLIANA
Dy. Speaker, Mizoram
&
MLA, 3-Mamit A/C

 CHIBAI LE
 

KTP General Conference2010 Mamit, Website ah ka lo lawm a che.
 
 He website hi KTP General Conference Vawi 53-na. March ni 4-7, 2010 chhunga Mamita lo awm tur atana inbuatsaihna hrang hrang tarlan ani a, a remchang ang zelin update ani zel dawn a, Mamit-a lo kal ve theilo tan pawh an awmhmun a tanga an lo zin ve theihna tur remchang a nih kan beisei.
 
 Kum 1985 khan Mammit-ah hian KTP General Conference hlimaw tak kan lo hmang tawh a. Kha mi tum khan Motor lian a la luh loh avangin mi tam zawk chu Dapchhuah atangin Km 26 ke in an kal nghe nghe a ni. Tunah chuan Kalkawng a lo tha ta a, Mamit in khaw tamtak anga kan harsatna thin, Tui lamah pawh kan lo ziaawm ta hle a, kum 1985 a Palaite harsa taka Mamit pana an lo kalte kha hre rengin KTP General Conference kan dawn hmasak atanga kum 25 na ah chiah KTP General Conference kan lo dawng leh thei tur hi kan lawmin kan phur hle a ni. Kum 1985-a lokalte phei kha chu lokal leh thei ngei ula kan duh hle a, kan lo duat hle dawn che u nia.
 
 He Conference hi Mamita Pastor Bial Hnih – Mamit Bial leh Mamit Hmunsam Bial te tangkawpin kan thleng dawn a. Presbyterian kohhran mal mai nilovin Mamit khawpui chhunga Kohhran hrang hrang leh Sorkar Department hrang hrang te nen lungrual tak leh phur takin Khawpum huapin kan inbuatsaih mup mup mai ani.
 
 Organising Committee in Sub-Committee hrang hrang a siam zinga Information&Punlicity Sub-Committee in he Website hi a buatsaih a, Internet Lamtluang zawh hleih theih loh chang a awm thin hi pawi kan ti a, chutiang chu a lo awm a nih pawhin kan hrethiam mai a ni ang chu.
 
 He KTP General Conference hi Zoram pum thalai tan Thlarau lam malsawmna anih nge kan beisei a, Pathian ropuina kan hmuh theuh theih nan he Website pawh hi Pathian ropui nan kan hlan a ni.

Upa H. Darhmingliana
Chairman Info&Publicity Sub-Committee
E-mail: dara_hmar@yahoo.com